tidlegare Sparebankstiftelsen DnB NOR
Sparebankstiftelsen DNB er ei av dei største allmennyttige stiftingane i Noreg, oppretta i 2002. Stiftinga har som føremål å vidareføre sparebanktradisjonane gjennom langsiktig eigarskap og utdeling av midlar til samfunnsnyttige føremål. Stiftinga deler årleg ut fleire hundre millionar kroner til allmennyttige føremål.
Stiftinga eig om lag åtte prosent av aksjane i finanskonsernet DNB og er den nest største eigaren etter den norske staten.
Sparebankstiftelsen DNB har røter tilbake til dei første norske sparebankane på 1800-talet. Dei norske sparebankane vart oppretta for å fremje sparing, økonomisk tryggleik og lokal samfunnsutvikling.
Då Gjensidige NOR vart børsnotert og omdanna til aksjeselskap i 2002, vart delar av eigarverdiane overførte til ei sjølveigande stifting for å sikre at overskotet framleis skulle kome samfunnet til gode. I 2003 fusjonerte Gjensidige NOR med Den norske Bank og danna DnB NOR, som frå 2011 fekk namnet DNB. Same året skifta òg stiftinga namn frå Sparebankstiftelsen DnB NOR til Sparebankstiftelsen DNB.
Stiftinga deler kvart år ut store summar til allmennyttige prosjekt. Midlane går særleg til tiltak på Austlandet innan kultur, kulturminnevern, frivillig arbeid, natur og friluftsliv, idrett, utdanning og inkludering av barn og unge. Eit sentralt satsingsområde har vore restaurering og vern av kulturhistoriske bygningar og fartøy, mellom anna gjennom program for bevaring av trehusmiljø, handverkstradisjonar og veteranfartøy.
Sparebankstiftelsen DNB har òg engasjert seg i kunnskaps- og mediesektoren. Gjennom dotterselskapet Amediastiftelsen vart stiftinga frå 2016 òg eigar i mediekonsernet Amedia AS. Føremålet med eigarskapen er mellom anna å bidra til sterke, uavhengige lokalmedium i Noreg. Stiftinga er medeigar og medlem i foreininga Store norske leksikon saman med universitet, høgskular og andre ideelle kunnskapsinstitusjonar.
Stiftinga har òg etablert og støtta fleire eigne initiativ innan kultur, kunnskap og samfunnsliv. Gjennom Dextra Musica eig stiftinga ei samling strykeinstrument av høg kvalitet som blir lånte ut til profesjonelle musikarar og talentfulle unge utøvarar.
Gjennom Dextra Foto har stiftinga bygd opp ei omfattande samling fotografi, med særleg vekt på dokumentarfotografi og samtidsfotografi. Samlinga blir forvalta i samarbeid med Preus museum og Nasjonalmuseet.
I 2016 opna kultur- og samfunnshuset Sentralen i dei tidlegare lokala til Christiania Sparebank i Oslo sentrum. Sentralen er eit kulturhus og møteplass for frivillige organisasjonar, kulturverksemd og samfunnsdebatt.
Sparebankstiftelsen DNB står dessutan bak fleire større satsingar innan mellom anna idrett, friluftsliv, kulturvern, nærmiljøutvikling og inkludering av barn og unge.
Kommentarar (1)
skreiv birthe selvaag
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.