Emine Arifi Bakalli

Emine Arifi Bakalli ishte historiane, profesoreshë universitare dhe studiuese shqiptare nga Kosova, e njohur për kontributin e saj në historiografinë moderne dhe bashkëkohore shqiptare me fokus studimet në marrëdhëniet shqiptare-serbe në Kosovë.

Emine Arifi Bakalli
Emine Arifi Bakalli
Lindi	10 tetor 1951, Ferizaj
Vdiq	3 gusht 2024
Kombësia	Shqiptare
Profesioni	Historiane, profesoreshë universitare

❏ Jeta e hershme dhe arsimi

Emine Arifi Bakalli u lind më 10 tetor 1951, në Babush i Muhaxhirëve, afër Ferizajt,  në një familje muhaxhirësh (shqiptarë të dëbuar me dhunë nga trojet e tyre gjatë ngjarjeve të viteve 1877–1878). Shkollimin  fillor më  1966  dhe atë  të  mesëm më  1970,  i kreu  në  Prishtinë. Pas përfundimit të shkollimit të mesëm, ajo studioi histori në Katedrën e Historisë të Fakultetit Filozofik të Universiteti i Prishtinës, ku diplomoi në vitin 1974. Në të njëjtin universitet përfundoi studimet pasuniversitare, duke fituar gradën magjistre e shkencave më 1977 dhe doktoruar poashtu në fushën e historisë në vitin 1984.

---

❏ Veprimtaria profesionale

Emine Arifi Bakalli ishte ndër pedagoget e para të Departamentit të Historisë në Universitetin e Prishtinës, ku ligjëroi lëndët në studimet themelore: “Histori   e   Popullit  Shqiptar   IV”,“Histori   Bashkëkohore   Shqiptare” dhe  “Histori  e Integrimeve  Evropiane”,  ndërsa në  studime master, ligjëroi lëndët: “Historiografi Shqiptare e Shekullit XIX-XX” dhe “Historia e Kosovës 1912-2008”. Ajo ka ndikuar në formimin e shumë brezave të studentëve të historisë, duke i mentoruar gjatë studimeve të doktoratës, masterit dhe bachelorit.

Gjatë viteve 1980–1990, ajo ishte aktive në mbrojtjen e autonomisë së Universitetit të Prishtinës, duke kundërshtuar masat e dhunshme dhe ndërhyrjet politike të regjimit të Slobodan Millosheviqit në sistemin arsimor në Kosovë.

---

❏ Angazhimi institucional dhe shoqëror

Përveç veprimtarisë mësimore, Arifi-Bakalli u angazhua në procese të rëndësishme reformuese në arsimin e lartë në Kosovë. Ajo ishte pjesë e grupit të ekspertëve për hartimin e planeve dhe programeve mësimore të historisë në kuadër të reformave arsimore. Kontributi i saj lidhet gjithashtu me përpjekjet për ruajtjen dhe avancimin e institucioneve arsimore në gjuhën shqipe në kushte të presionit politik dhe institucional gjatë periudhës së viteve 1981–1999.

❏ Kontributi shkencor

Emine Arifi Bakalli ishte historiane e shquar, e cila ka arritur rezultate të rëndësishme në fushën e historisë. Ajo ka zhvilluar me përkushtim të veçantë kërkime shkencore, të cilat janë fokusuar në historinë e shqiptarëve mes dy luftërave botërore. Në studimet e saj, ajo ka trajtuar aspekte ekonomike, si dhe marrëdhëniet ndërmjet shqiptarëve dhe jugosllavëve. Më tej, vëmendje të veçantë i ka kushtuar pozitës politike të shtetit shqiptar në kuadrin ballkanik dhe evropian. Gjithashtu, ajo ka analizuar edhe marrëdhëniet italo-shqiptare dhe italo-jugosllave. Një interes të veçantë, prof. Arifi Bakalli i ka kushtuar edhe gjendjes së popullit shqiptar brenda Mbretërisë së Jugosllavisë.

---

❏ Veprat

Emine Arifi Bakalli ka botuar këto monografi:

o   Marrëdhëniet ekonomike shqiptaro-jugosllave 1929-1939 - (1997)

o   Përballje historiografike – (2015)

o   Çështje nga historia moderne dhe bashkëkohore shqiptare; - (2012) dhe

o   Drejt eliminimit të faktorit shqiptar në Ballkan; - (2023).

---

❏ Artikuj shkencorë

Arifi Bakalli është autore e dhjetëra artikujve dhe kumtesave shkencore të publikuara në revista dhe konferenca shkencore vendore dhe ndërkombëtare. Ndër to përfshihen:

· “Përballja e Shqipërisë me pozitën e shqiptarëve në Jugosllavi 1935” - (2023)

· “Qëndrimi i Shqipërisë ndaj sanksioneve të Lidhjes së Kombeve kundër Italisë fashiste 1935”- (2023)

· “Kryengritja e Fierit” si shkak i kthesës negative në marrëdhëniet shqiptaro-jugosllave” – (2023)

· “Programi i Zoran Gjingjiqit për Kosovën apo programi serb për Kosovën” - (2023)“Porositë e Mbretit Zog drejtuar Jugosllavisë apo premisat për marrëdhënie të mira fqinjësore shqiptaro-jugosllave” - (2024).

❏ Referenca